Pork Barrel, Politicians, and Public Service

August 26, 2013. Holiday dahil National Heroes Day. Bagamat wala kaming pasok sa school, kinailangan ko pa rin pumunta dahil mayroon kaming meeting ng mga instructors. Habang nasa byahe ako ay naipit naman ako sa matinding traffic mula Roxas Blvd. hanggang T.M. Kalaw. Mayroon nga palang Million People March na ginaganap sa Luneta. Halos daang libong taong mga nakasuot ng puti ang nakikita kong may dalang mga placards. Lahat sila kontra sa Pork Barrel. Lahat sila gustong iabolish na ang Pork Barrel.

Ano ang Pork Barrel?

Ang paggamit ng salitang PORK BARREL ay nagmula umano sa mga kasaysayan ng mga Amerikano. Noong panahon daw kasi bago ang Civil War, binibigyan ang mga alipin sa Amerika mula sa bandang katimugan ng mga baboy na nasa bariles bilang regalo sa holiday. Ang mga alipin naman ay nakikipagkumpitensya sa ibang mga alipin para makuha ang parte nila sa nasabing regalo.

Ngunit pagdating sa politika, ang Pork Barrel ayon sa http://tl.wikipedia.org ay ang nilaang malaking halaga ng pambansang taunang badyet ng pamahalaan sa mga mambabatas ng bansa. Ang bawa't senador ay pinaglalaanan ng 200 milyong piso at ang bawa't kinatawan ay pinaglalaanan ng 70 milyong piso sa programang tinatawag na Priority Development Assistance Fund o PDAF.

Bakit gusto (o mahalaga) ng mga politiko ang Pork Barrel? 

Para sa mga politiko, mahalaga ang mabigyan sila ng Pork Barrel o ng bahagi sa taunang badyet ng pamahalaan dahil ito ang nagagamit nila para matustusan ang kanilang mga proyekto para sa mga mamamayan.

Ayon kay Senador Panfilo Lacson, ang isang kurakot na mambabatas ay maaaring makakuha ng hindi bababa sa 20 porsiyentong komisyon sa paggamit ng kaniyang taunang itinalagang pork barrel para sa inprastraktura at iba pang mga proyekto. Ayon din kay Lacson, ito'y nangangahulugang ang isang kurakot na senador ay maaaring makapagbulsa ng 40 milyong piso kada taon, 240 milyong piso sa anim na taon at 480 milyon sa 12 taon.

Ito ang ipinaglalaban ng mga raliyista -- ang alisin na ang Pork Barrel dahil ito ang nagiging dahilan ng corruption. Imbes na mapunta sa taumbayan ang buwis na kanilang ibinigay sa pamamagitan ng mga proyekto, ay napupunta lang sa mga bulsa ng mga kurakot na politiko.

Makakagawa ba ng proyekto ang mga politiko kahit walang Pork Barrel?

Oo, makakagawa pa rin ng proyekto ang mga politiko kahit walang Pork Barrel. Kung bibigyan man sila ng Pork Barrel, dapat lang ay tama ang paggamit nito. Pero kung tutuusin, hindi na talaga nila kailangan ng Pork Barrel. Hindi ba't kaya sila tumakbo noong eleksyon dahil gusto nila maging PUBLIC SERVANT? Ibig sabihin, maglilingkod sila sa bayan sa kanilang sariling paraan, hindi sa paraang kukuha sila ng pera sa mga mamamayan na siya nilang gagamitin para pang tulong din sa mga mamamayan. Para na nilang ginisa sa sariling mantika ang mga tax payers.

Kaya nga noong may nabasa akong article na sinabi umano ng isang Congresswoman sa isang probinsya na "Ok lang na alisin ang pork barrel. Basta huwag lang manghihingi sa amin ang mga mamamayan. E ano'ng ibibigay namin? Hindi naman pwede yung pinaghirapan namin dahil sa personal naman namin 'yun, sa mga anak, sa mga pang-araw-araw na panggastos namin." Sa loob-loob ko, hindi ata nalalaman ng Congresswoman na ito ang salitang "PUBLIC SERVICE". Kaya ka lang ba tutulong sa mamamayan kapag binigyan ka ng pera na galing rin sa kanila? At kung wala nang ibigay sa iyo, hindi ka na gagawa ng mabuti sa kapwa mo dahil yung pera mo ay para lang sa inyo ng pamilya mo? Hindi ko alam bakit siya nanalo kung ganun ang pananaw niya.

Public Service Without The Pork Barrel.

Hindi kinakailangan ng Pork Barrel para makatulong sa mamamayan. Sa katunayan, nagagawa nina Bro. Eli Soriano at Kuya Daniel Razon na tumulong sa kapwa kahit hindi sila politiko at wala naman silang pork barrel na natatanggap. Nagagawa nila ang iba’t ibang paglilingkod sa kapwa ng LIBRE at walang hinihintay na kapalit gaya ng mga sumusunod:

• Libreng Sakay (Bus, Jeep, Lantsa, Eroplano)
• Free Clinic (everyday)
• Free Transient
• Free Legal Consultation
• Free Education (Preschool to College)
• Feeding Programs
• 24/7 Rescue (Tulong Muna Bago Balita / Tulong Muna Bago Pasada)
• Orphanage 

photos courtesy of  http://www.danielrazon.org

Bukod pa dito ay on-going ang UNTV Cup, isang basketball league na panukala ni Kuya Daniel Razon kung saan mayroong 7 teams na naglalaro para sa premyong 1 milyong piso. Ngunit ang halagang ito ay hindi mapupunta sa mga manlalaro kundi sa charitable institution na napili nilang tulungan.

 photo courtesy of  http://www.untvweb.com 

Ang Konklusyon
Mahalaga ang Pork Barrel kung tama ang paggamit dahil maari itong gamitin para sa mga proyektong ang pangunahing makikinabang ay ang mga mamamayan. Pero hindi dapat nakadepende lang sa Pork Barrel ang pagtulong sa kapwa. May Pork Barrel man o wala, magagawa mo pa ring makatulong sa kapwa tao kung talagang gugustuhin mo. Dun mas makikita ang intensyon ng tao lalo na ng mga politiko kung sinsero sila sa pagtulong. Maari namang makagawa ng mga public services ang mga politiko kahit walang pork barrel. Katunayan, nagagawa ito nina Bro. Eli Soriano at Kuya Daniel Razon. Bagama’t hindi sila mga politiko, bagama’t wala silang Pork Barrel, at bagama’t pinasasama sila ng mga kaaway nila, patuloy pa rin ang kanilang paglilingkod sa kapwa, at patuloy na ginagawa ang tunay na kahulugan ng PUBLIC SERVICE.